Men sa w dwe konnen sou pwojè lwa Berny Jacques la

Par Freudly BEAUPLAN

Reprezantan ameriken‑ayisyen Berny Jacques, ki fèt Pòtoprens, prezante HB 1307, yon pwojè lwa sou imigrasyon ki vize imigran san papye nan Lèzetazini.

Pwojè a pwopoze gwo mezi , tankou entèdiksyon pou ouvri kont labank, jwenn prè oswa voye lajan pou moun san estati legal. Li obligatwa pou patwon itilize E-Verify, epi konpayi ki vyole règleman yo ka fè fas ak amann, sispansyon oswa revokasyon lisans.

Berny Jacques di lwa a vize retire atraksyon pou imigrasyon ilegal epi responsabilize patwon yo.

Men prensipal mezi ki nan pwojè a, daprè media The Haitian American :

1-Entèdiksyon pou travayè san papye ouvri kont labank, jwenn prè, resevwa lisans oswa sèvis finansye, oswa benefisye pwogram leta pou achte kay.

2-Restriksyon sou transfè lajan pou moun ki pa gen estati legal.

3-Oblijasyon pou patwon itilize sistèm federal E-Verify pou verifye estati travayè yo.

4-Sanksyon pou konpayi ki anplwaye travayè san papye :
-10 000 dola amann ak sispansyon lisans 1 an pou yon premye fwa,
-Jiska 100 000 dola ak sispansyon 5 an pou  dezyèm fwa,
-Revokasyon lisans definitivman ak amann jiska 250 000 dola pou twazyèm fwa.

5-Konpayi ki anplwaye plis pase 50 travayè san papye ta konsidere kòm koupab yon krim twazyèm degre, ak pèdi lisans li otomatikman.

6-Responsablite legal patwon pou aksidan, blesi oswa lanmò travayè san papye, epi ranbousman depans medikal piblik.

7-Etabli yon prezonpsyon koupabilite kont chofè san papye nan aksidan sikilasyon, sof si gen prèv ki montre kontrè a.

Patizan pwojè lwa a di mezi sa yo ap diminye chay finansye sou kontribyab epi mete plis disiplin nan mache travay la. Bò kote pa li, opozisyon an avèti lwa a ka ogmante travay kache, ensekirite sosyal, epi frape fanmi imigran yo dirèkteman.

Freudly BEAUPLAN