Ayiti vs Nikaragwa : yon match desizif nan dat senbolik 18 novanm

Seleksyon nasyonal Ayiti a ap jwe kont Nikaragwa 18 novanm nan, nan kad kalifikasyon pou Koup di Mond 2026. Plis pase 50 ane apre patisipasyon istorik 1974 la, Ayiti gen yon nouvo chans pou retounen sou gwo sèn foutbòl mondyal la.

Koup di Mond 2026 la, ki pral fèt Ozetazini, Kanada ak Meksik, ap genyen 48 ekip pou premye fwa. Sa ouvè pòt pou nasyon tankou Ayiti ekri yon nouvo chapit nan istwa foutbòl yo.

18 novanm se yon dat senbolik pou pèp ayisyen an. Se jou Batay Vètyè, senbòl kouraj, rezistans ak viktwa. Ane sa a, match la pran plis sans, paske li ka make yon vire nan avni foutbòl peyi a.

Malgre difikilte politik, ekonomik ak sosyal, foutbòl kontinye rasanble Ayisyen yo, bay espwa ak fyète. Grenadye yo ap antre sou teren an ak yon objektif klè : fè Ayiti pwoche pi pre Koup di Mond la epi pote yon moman fyète pou tout peyi a.

Yon viktwa ki ka vin youn nan pi gwo moman nan istwa modèn seleksyon an, depi eksplwa 1974 la. Nan jou senbolik sa a, pèp la kenbe souf li.

Ayiti espere. Ayiti kwè. Ayiti kanpe djanm. Grenadye alaso !

Freudly Beauplan